ПИСМЕНО БАРАЊЕ ДО ПРЕТСЕДАТЕЛОТ НА Р. МАКЕДОНИЈА ВО ВРСКА СО ИЗМЕНИТЕ И ДОПОЛНУВАЊАТА НА ЗАКОНОТ ЗА ОСНОВНО ОБРАЗОВАНИЕ

Коалицијата за заштита на децата испрати писмено барање до претседателот на Р. Македонија г-ѓа Гордана Сиљановска-Давкова да ги потпише Указите за донесување на законите за измена и дополнување на Законот за основно образование и Законот за учебници за основно и средно образование, со образложение дека на тој начин децата ќе бидат заштитени од штетните влијанија на родовата идеологија и ќе се даде предност на правата на родителите, како единствени старатели на своите малолетни деца.

Ја повикуваме да ја оправда довербата којашто ѝ беше дадена од родителите.

Почитувана г-ѓо Гордана Силјановска-Давкова,

претседател на Р. Македонија,

Се обраќаме до Вас во врска со најновите измени и дополнувања на Законот за основно образование и Законот за учебници. Во светло на актуелните настани, сметаме дека како коалиција на повеќе од 30 организации, составена воглавно од родители, важно е да се изјасниме по однос на прашањето за родовиот идентитет, кој со предложените измени се исклучува од наведените закони.

Најпрво, важно е да се истакне дека родовиот идентитет не е легално признат во Р. Македонија и Уставот познава само два пола – машки и женски, а прашањето на родовиот идентитет не е регулирано ниту признаено како правен термин. Затоа, сметаме дека не треба да се поттикнуваат идеи кои не се правно признати и кои може да создадат правна конфузија и нејаснотија во нашето општество.

Понатаму, родовиот идентитет, во сериозните научни и медицински кругови, се смета за психолошко нарушување. Поради тоа, сметаме дека не е одговорно да се нормализира и афирмира концепт кој не е докажан како здрав и кој е контроверзен во медицинскиот и правниот контекст. Самоидентификацијата во однос на родовиот идентитет, како што е дефинирано во најновите извештаи и медицински истражувања, треба да се третира внимателно, и не треба да се толерира навлегување на антинаучни идеи во образовниот процес на младите и децата.

Дополнително, правото на родителите да ги воспитуваат и образуваат своите деца е фундаментално. Родителите се тие кои треба да имаат најголема улога во одлучувањето за воспитувањето на своите малолетни деца, а не ЛГБТИ+ лобистичките групи. Овие прашања треба да се разгледуваат во рамките на семејството, а не преку институции или организации кои можат да создадат регресија и конфликти во воспитувањето на децата.

Затоа, бараме од Вас да ги потпишете Указите за донесување на овие измени на Законот за основно образование и Законот за учебници, со кои се сложуваат мнозинството од родителите кои Ви ја дадоа нивната доверба. Треба да се има предвид дека предложените измени се во целосна согласност со правниот систем на Р. Македонија и непотпишувањето на истите може само да донесе штетни последици за воспитанието и благосостојбата на нашите деца.

Со почит,

Коалиција за заштита на децата